EUSKARABENTURA.

Iragan astelehenean abiatuak dira oinez Mauletik Euskarabentura ekimenean parte hartzen ari diren 110 gazte euskaldunak, gehi heiekin doazen 30 helduak. Uztail osoan Euskal Herriko bazterrak zeharkatuko dituzte, zazpi probintzietako txokoak, historia, biztanleak, tradizio eta ohidurak, ospakizunak eta gehiago zuzenean leku bakotxean bertako jendeen eskutik ezaguturik. Badira hor Diasporako bi kide: Imanol Basterra, Argentinako Patagoniakoa, eta Estatu Batuetako Unai Fraeters, Washington hiriburukoa. Zorterik onena heieri eta talde osoari, proposamen eder huntan parte harturik!

VALPARAISO, TXILE.

Ezagutzen duzun gazterik Txileko Viña-Valparaisora ikastera doana? Jakin zazu, abantailak ukaiten ahal dituela han bereko Euskal Etxeak abiarazi duen ‘Denon Etxea’ programarekin. Euskal Etxea ahal eta hobekien aitzinarazteko eta ber denboran Euskal Herritik jinik hiriko unibertsitateetan ikasle direneri laguntzeko, programa hunek ostatu eskaintzen die gazteeri Euskal Etxean berean. Euskal Etxeko eraikinak bere baitan --sargia berezitua-- apartamendu bat du eta hiru gazterendako bizitokia. Beraz, etxea errentatu egiten die, prezio apalean, Euskal Herriko gazteeri, Euskal Etxeko dinamizazioan laguntzearen truke, euskaran, musikan, dantzetan, kantuan... Aukera ona da bi aldeendako. Kontaktatzeko, Facebook- en, Denon Etxea.

EUSKAL ARGENTINA.

Bilkura idekia deitua zuen Donapaleun joanden astelehenean, Monika Legarto buru duen Euskal Argentina elkarteak, urri-azaroan Argentinara, Mar del Platako Euskal Astera eginen duten bidaia prestatzeko. Urriaren 30etik azaroaren 19ra izanen da, Euskal Argentina eta HB Evasion agentzia antolatzaile. Bidaiak badu parte bat elgarrekin egiteko, eta beste bat libro, nahi duenak bere familiakoak bisitatzeko- edo pentsatua. Interesatua bazira, aski duzu telefonatzea 0685 946 112 zenbakira (Euskal Argentina) edo 0559 654 748ra (HB Evasion).

MONTREAL, QUEBEC.

Lehenengo diska ateraia du Quebec-eko Sasi Ardiak taldeak eta ondarreko egunetan aurkeztu du Montrealen eta Quebec Hirian: joanden igandean lehenik, Montrealeko Balattou Klubean eta gero astelehen-asteartez hiriburuko Le Murphy pub-ean eta Tadoussac aterpetexean. Montrealen bizi den Maider Martineau kantari, musikari eta trikitilari makearra du buru Sasi Ardiak-ek, eta Maiderrekin batera Jokin, Vianney eta Pauline ari dira. Jotzen dituzten instrumentuak, trikitia, panderoa, alboka, txirula, ttunttuna, atabala, tuba eta beste. CDaren prezioa, 15 dolar kanadatar. Taldea Facebook-en dago.