Han eta Hemen | 2018ko Maiatzaren 10a
Haziak Loratzen : Jokin Zaldunbideren tisanak
Itsasuko AEK gau eskolako B1 taldekoak
Urte hasieran, kurtsoan, sendabelar batzuk ezagutu genituen. Gaia sakontzeko ikaskide batek ezagutzen zuen Jokin Zaldunbiderenganat joatea proposatu zigun. Orduan, denak elgarrekin Arbonarat joan ginen. Jokinek bi urteko ikasketak egin ditu eta sendabelar-fitologo diploma ukan du. Ondotik, laborantza diploma ukan zuen ere. Gaur egun, Arbonako herriak lur komunal bat alokatzen dio. Geroztik, 40 bat landare mota desberdin lantzen ditu. Beste 20 bat biltzen ditu izadian. Horiekin tisanak egiten ditu baita gantzugailu batzuk ere. Tisanak, kostaldeko AMAP baten bidez saltzen ditu baita bio dendetan ere (Biarritzen, Senperen, Hazparnen) edo Baiona eta Biarritzeko merkatuetan. Landareez duen ezagutza eta transmititzeko erakusten duen gogo ona anitz preziatu dugu. Orain badakigu xarpota ez dela bakarrik eltzekarian emateko on baina hats-bideak sendatzeko ere balio duela. Bestalde, jakin dugu “txotx” ez dela bakarrik sagarnotegietan entzuten: landare bati zati pusatu berri bat hartuz (“txotxa”) beste bat sorrarazten ahal dela. Adibidez, erromaniarekin, betibiziarekin, bixi belarrarekin eta abar. Hobeki lo egiteko edo liseritzeko, Jokinen tisana onak edatea aholkatzen dizuegu.