Liburu arraroa zaiku presentatua izan joan den ostiralean Baionako Euskal Museoan, Xabier Elosegi ikerle nekaezinaren lan sakonaren fruitua: "Senpereko (eta Lapurdiko) euskara XVIII. mendean", Lapurdi 1609 elkarteak argitaratua. XVIII. mendeko notario-agiri zenbaitetan ditu aurkitu euskarazko testuak (internetezko earchives64 atarian), hobeki erran lapurterazkoak, Senpere eta Ahetze eskualdekoak (notarioek normalki frantsesez zituzten agiriak idazten bainan zenbaitzuk euskararekiko atxikimendua eta euskararen erabiltzearen beharra suharki dituzte agertu). "Aurkikuntza ederra, dokumentu biziki interesgarriak", Xarles Videgain euskaltzainaren hitzetan, hunek diola liburuaren aitzin-solasa idatzia. "Nolaz lo egon dira gaur arte, nehor ohartu gabe?" zuela galdetzen ere Xarlesek. Xabier bezalako bat behar zen horieri ohartzeko batetik eta horiek guziak transkribatzeko, ez baita lan ttikia, Lapurdi 1609ko kide den Auxtin Zamorak azpimarratu daukun bezala. Orotara 78 dokumentu ditu liburuak agertzen, gutiz gehienak Martin Harismendy notarioarenak (57), besteak bertze zazpi notariorenak ditugula (21), Dolhagaray, Dhospital, Bertrand Planthion, Delissalde- Lahet, Michel Garrin, Jean- Pierre Duhalde eta Michel Duhalderenak. Martin Harismendyren dokumentuak bi zatitan banatu ditu Elosegik: 41 dokumentu gai orokorrez ari dira eta bertze 16ak Senpereko oihanzaintzari buruzkoak dira. Oro har, liburu hau (186 orrialde, 15€) lekukotasun biziki pollita da orduko lapurteraz bai eta garaiko jendeen ohidurez eta sozial harremanez, elementu historiko batzuk ere zaizkigula azalduak. Altxor bat, besteak beste Sarako Idazleen Biltzarrean aurkituko duzuena!