Han eta Hemen | 2017ko Maiatzaren 25a
Hazparnen bertsu eguna - Elixabet Etchandy bertsulari gazteen xapeldun
B.S.
Aitzineko urtean bezala iragan dira joan den larunbatean Hazparneko Haritz-Barne aretoan bi ekitaldi batean: bertsu eskolen eguna eta XILABA-ko eskolartekoan 14-18 urte arteko bertsolari gazteen txapelketa. Lehiakideen lanen artetik, Aimar Karrika gidari, dozena bat gaztetxo taldek, bertsu eskoletan dabiltzanak, kantatu dituzte moldatuak zituzten bertsu sortak, zonbaitek doinu berezitan edo berdin antzeztuz, Maddalen Arzallus zutela lagun gitarrarekin. Lan ederrak baziren, gai erabiliak bazen orotarik. Txapelketako kanporaketan hamabi gazte dira lehiatu. Emanak zitzaizkien lanen ondotik goiz bukaeran lau ziren bakarrik sailkatzen arratsaldeko finalerako, parekotasun batean gertatzen zirela bi nexka: Elixabet Etchandy eta Julene Etcheberry, bi mutiko Haitz Capot Thornary eta Oier Urreizti. Bazkal ondoan Xan Alkhat-ek kudeatu du finala eta lanen ondotik Elixabet egin da azkenean txapeldun.
Heldu den ekainaren 10ean jokatuko da Euskadi osoko eskolarteko gazteen txapelketa, aurten Sarako polikiroldegian. Xilabak beraz bost ordezkari izanen ditu: Julene Etcheberry (Sara) eta Irati Alkantarilla (Urruña) Lapurdirentzat; Elixabet Etchandy (Izpura) eta Oier Urreizti (Bidarrai) Baxenabarrerentzat; Haitz Capot Thornary (Zalgize) Xiberoarentzat. Oraindanik Hegoaldeko haurrideen artean suerte on bat besterik ez diegu desiratzen.